Angliyaning «Manchester Yunayted» va «Chelsi» klublari «Aston Villa» yarim himoyachisi Morgan Rodjersga qiziqish bildirmoqda.

Manbalarga ko‘ra, har ikki klub 23 yoshli futbolchi uchun kurash olib borishga tayyor. Birmingem jamoasi esa o‘z futbolchisini kamida 100 million funt sterling (taxminan 116 million yevro) evaziga sotishni rejalashtirmoqda.

Qayd etilishicha, «Aston Villa» bosh murabbiyi Unai Emeri Rodjersni jamoaning eng muhim o‘yinchilaridan biri deb hisoblaydi. Shu bois klub avval boshqa futbolchilarni sotish imkoniyatini ko‘rib chiqadi.

Joriy mavsumda Morgan Rodjers barcha musobaqalarda 44 ta o‘yinda ishtirok etib, 10 ta gol va 7 ta golli uzatma muallifi bo‘ldi. Uning klub bilan amaldagi shartnomasi 2031 yil yozigacha mo‘ljallangan.

Transfermarkt ma’lumotiga ko‘ra, futbolchining bozor qiymati hozirda 80 million yevroni tashkil etadi.