2026 yilgi Jahon chempionatidan so‘ng Didye Desham Fransiya terma jamoasi bosh murabbiyi lavozimini tark etadi. Deyarli besh yildan beri murabbiylik qilmayotgan Zinedin Zidan «uch ranglilar»ning yangi ustoziga aylanishi haqida gap-so‘zlar yuribdi. Fransiya terma jamoasining yulduzli hujumchisi Kilian Mbappe ushbu mavzuda o‘z fikrini bildirdi.
«Prezident va federasiya — muddatlarni nazorat qiluvchi organlardir. Yangi murabbiyning ismi qachon e’lon qilinishini ular hal qilishadi. U kim bo‘lishini vaqt ko‘rsatadi, men bilmayman (kulimsirab)», — deya Mbappening so‘zlaridan iqtibos keltirmoqda The Touchline.
Didye Desham Fransiya terma jamoasini 2012 yilning iyul oyida boshqarishni boshlagan edi. 2018 yilda «uch ranglilar» Rossiyada bo‘lib o‘tgan Jahon chempionatida g‘olib chiqishgan.
