«Lans» klubi Fransiya chempionati doirasidagi «PSJ»ga qarshi o‘yinning ko‘chirilishiga qarshi chiqqan edi, biroq Professional futbol ligasi baribir parijliklar manfaatini ko‘zlab uchrashuvni boshqa muddatga qoldirdi. Endi «PSJ» Chempionlar ligasi chorak finalida «Liverpul»ga qarshi o‘yinlar oralig‘ida ichki birinchilikda maydonga tushmaydi.

O‘yin ko‘chirilishi e’lon qilinganidan so‘ng, «Lans» rasmiy bayonot bilan chiqdi. «Qonli-oltinranglilar» bu qarorga rozi bo‘lmasalar-da, uni qabul qilishga majbur bo‘ldilar.

«LFP direktorlar kengashining «PSJ»ga qarshi o‘yinni ko‘chirish borasidagi bir ovozdan qabul qilgan qaroriga norozilik bildirgan holda, «Lans» uni mas’uliyat bilan qabul qiladi va o‘z oldiga qo‘ygan sport maqsadlariga erishish yo‘lidagi qat’iyatini tasdiqlaydi», — deyiladi klub bayonotida.

Ayni damda «Lans» Liga 1 turnir jadvalida ikkinchi o‘rinni egallab turibdi va «PSJ»dan bir ochko orqada qolmoqda. Shu bilan birga, parijliklar hisobida bitta zaxira o‘yini mavjud.