Madridning «Real» klubi himoyachisi Antonio Ryudiger Myunxenning «Bavariya» jamoasini Yevropaning eng yaxshi jamoasi deb atadi.

Chempionlar ligasi qur’asi jamoalarni allaqachon chorak finaldayoq o‘zaro to‘qnash keltirdi. Ryudigerning fikricha, madridliklarga eng yomon ikki variantdan biri nasib qilgan.

«Biz «Real»da barchamiz mutlaqo barqaror va jahon darajasidagi jamoa bilan to‘qnash kelishimizni tushunib turibmiz. Hozirgi vaqtda ular «Arsenal» bilan bir qatorda Yevropadagi eng barqaror va eng yaxshi jamoa hisoblanadi», — deya futbolchining so‘zlarini keltiradi Kicker nashri.

Birinchi uchrashuv 7 aprel kuni «Santyago Bernabeu» stadionida bo‘lib o‘tadi. O‘yin Toshkent vaqti bilan 00:00 boshlanadi. Eslatib o‘tamiz, 1/8 finalda «Bavariya» ikki o‘yin natijasiga ko‘ra «Atalanta»ni tor-mor etgan bo‘lsa, «Real» «Manchester Siti»ni musobaqadan chiqarib yuborgan edi.