Argentina terma jamoasi bosh murabbiyi Lionel Skaloni hujumchi Janluka Prestianni va Vinisius Junior o‘rtasida sodir bo‘lgan mojaroli vaziyatni futbolchi bilan muhokama qilmaganligini bildirdi.
«Benfika» hujumchisi Chempionlar ligasi doirasidagi «Real»ga qarshi o‘yinda (0:1) yuz bergan voqea bo‘yicha UYEFA surishtiruvi davom etayotgan bir vaqtda milliy jamoaga chaqirilgan edi. Eslatib o‘tamiz, madridliklarning braziliyalik vingeri Vinisius argentinalik futbolchini o‘zini «maymun» deb haqorat qilganlikda ayblagan edi.
«Biz bo‘lib o‘tgan voqea haqida gaplashmadik. Buni u bilan muhokama qilish mening ishim emas. Men uning mashg‘ulotlarda o‘zini yaxshi ko‘rsatayotganini ko‘ryapman. U bizga yordam bera oladi. Janluka o‘ng qanotda ham, chapda ham o‘ynay oladi — bu biz uchun yaxshi variant. Mavritaniyaga qarshi o‘yinda unga maydonga tushish va o‘zini ko‘rsatish uchun imkoniyat beramiz», — dedi Skaloni o‘rtoqlik uchrashuvi oldidan o‘tkazilgan matbuot anjumanida.
