Аргентина терма жамоаси бош мураббийи Лионель Скалони ҳужумчи Жанлука Престианни ва Винисиус Жуниор ўртасида содир бўлган можароли вазиятни футболчи билан муҳокама қилмаганлигини билдирди.

«Бенфика» ҳужумчиси Чемпионлар лигаси доирасидаги «Реал»га қарши ўйинда (0:1) юз берган воқеа бўйича УЕФА суриштируви давом этаётган бир вақтда миллий жамоага чақирилган эди. Эслатиб ўтамиз, мадридликларнинг бразилиялик вингери Винисиус аргентиналик футболчини ўзини «маймун» деб ҳақорат қилганликда айблаган эди.

«Биз бўлиб ўтган воқеа ҳақида гаплашмадик. Буни у билан муҳокама қилиш менинг ишим эмас. Мен унинг машғулотларда ўзини яхши кўрсатаётганини кўряпман. У бизга ёрдам бера олади. Жанлука ўнг қанотда ҳам, чапда ҳам ўйнай олади — бу биз учун яхши вариант. Мавританияга қарши ўйинда унга майдонга тушиш ва ўзини кўрсатиш учун имконият берамиз», — деди Скалони ўртоқлик учрашуви олдидан ўтказилган матбуот анжуманида.