«Barselona» darvozaboni Joan Garsiya Ispaniya terma jamoasidagi adaptasiya jarayoni haqida gapirib o‘tdi.

24 yoshli futbolchi hozircha «qizil furiya» safida debyut qilmagan bo‘lsa-da, ilk bor terma jamoa yig‘iniga taklif etildi. Posbonning so‘zlariga ko‘ra, Ispaniya milliy terma jamoasining o‘yin uslubi «Barselona»nikiga o‘xshash, shu sababli moslashishda muammolar yuzaga kelmasligi kerak.

«Menimcha, hujumkor futbol o‘ynash va tashabbusni o‘z qo‘liga olish — tarkibimizdagi futbolchilarni hisobga olsak, eng to‘g‘ri yondashuvdir. Bu, shuningdek, Ispaniya terma jamoasining so‘nggi yillardagi o‘ziga xos uslubiga ham mos keladi. Hamma, shu jumladan men ham bunday tizimda o‘zimni qulay his qilmoqdaman, shu sababli vazifa ancha osonlashadi», — deya Garsiyaning so‘zlarini keltirmoqda Mundo Deportivo nashri.