Angliya terma jamoasi bosh murabbiyi Tomas Tuxel Urugvayga qarshi kechgan o‘rtoqlik uchrashuvida (1:1) ishqibozlarning xatti-harakatidan noroziligini bildirdi.

Fanatlar to‘rt yillik tanaffusdan so‘ng ilk bor milliy jamoa safida maydonga tushgan «Arsenal» himoyachisi Ben Uaytni hushtaklar bilan kutib olishdi. 28 yoshli futbolchi 69-daqiqada zaxiradan maydonga tushdi va qisqa vaqt ichida ham qahramonga, ham antiqahramonga aylanishga ulgurdi: 81-daqiqada u hisobni ochdi, biroq hakam tomonidan qo‘shib berilgan vaqtda o‘z jarima maydonchasi ichida qoida buzdi — Federiko Valverde esa penaltini aniq amalga oshirdi.

«Men hushtaklardan hafsalam pir bo‘ldi. Albatta, biz o‘z futbolchilarimizni himoya qilishimiz kerak. Ben o‘zini ajoyib ko‘rsatdi va maydonga tushishga loyiq edi. Biz uni doim qo‘llab-quvvatlaymiz. U hayotida yangi sahifa ochishga tayyor — biz esa unga bu imkoniyatni beryapmiz», — deya Tuxelning so‘zlarini keltirmoqda jurnalist Fabrisio Romano.

Eslatib o‘tamiz, Ben Uayt Garet Sautgeyt davrida uning yordamchilaridan biri bilan yuzaga kelgan ziddiyat tufayli Angliya terma jamoasida o‘ynashdan bosh tortib kelayotgan edi.