Braziliya terma jamoasining o‘rtoqlik uchrashuvida jarohat olgan Rafinya Dias yaqin oradagi o‘yinlarda «Barselona»ga yordam bera olmaydi.
29 yoshli futbolchi Braziliya va Fransiya o‘rtasidagi yaqinda bo‘lib o‘tgan bahsning tanaffusida majburiy ravishda almashtirilgan edi. Muammo jiddiy bo‘lib chiqdi: yulduzli futbolchi tizza osti paylari jarohati sababli taxminan besh haftani o‘tkazib yuboradi. Sport nashrining xabariga ko‘ra, «Barselona»da yuzaga kelgan vaziyat tufayli g‘azab va sarosima hukm surmoqda. Klub vakillarining fikricha, Braziliya tomoni o‘rtoqlik uchrashuvi uchun Rafinyaning sog‘lig‘ini xavf ostiga qo‘ymasligi kerak edi.
«Barsa» ustozi Xans-Diter Flik avvalroq futbolchilarning terma jamoalarda jarohat olishidan noroziligini bildirgan edi, endi esa murabbiylar shtabining g‘azabi yanada kuchaydi.
