«Manchester Yunayted» yarim himoyachisi Brunu Fernandesh Portugaliya terma jamoasining bo‘lajak Jahon chempionatidagi imkoniyatlari haqida o‘z fikrlari bilan o‘rtoqlashdi.
Portugaliyaliklar guruh bosqichida O‘zbekiston va Kolumbiya terma jamoalari bilan bir guruhdan joy olishgan, uchinchi raqib esa saralashning o‘tish o‘yinlari natijasiga ko‘ra aniqlanadi. Meksikaga qarshi kechadigan o‘rtoqlik uchrashuvi oldidan jurnalistlar Fernandeshdan Portugaliya mundial favoriti ekanligi haqidagi fikrga qo‘shilish-qoshilmasligini so‘rashdi.
«Men buni qo‘shimcha bosim emas, balki ijobiy holat sifatida qabul qilaman. Odamlar bizda iqtidorli futbolchilarni, muvaffaqiyatga erisha oladigan kuchli jamoani ko‘rishmoqda. Biz buni o‘z ustunligimizga aylantirishimiz kerak. Qo‘rqadigan hech narsa yo‘q. Bizni hurmat qilishlarini bilamiz. Biz ham raqiblarni hurmat qilamiz, shu bilan birga, har bir o‘yindagi maqsadimiz — g‘alaba qozonish», — dedi «Manchester Yunayted» sardori matbuot anjumanida.
Portugaliya va Meksika terma jamoalari o‘rtasidagi uchrashuv 29 mart kuni bo‘lib o‘tadi.
