«Manchester Yunayted»ning sobiq futbolchisi Ouen Xargrivz «qizil iblislar»ga yozgi transferlar bo‘yicha maslahat berdi.

«Agar «Manchester Yunayted» haqida gapiradigan bo‘lsak, ularda Angliya terma jamoasi darajasidagi yarim himoya mavjud edi, ammo so‘nggi yillarda ular bundan uzoqlashib ketishdi. Ularda Kobbi Maynu bor. Kazemiro ketmoqda. Brunu Fernandeshga kelsak, uning «MYU»da yana qancha qolishini kim biladi, deysiz? Lekin agar siz tarkibni rejalashtirayotgan bo‘lsangiz, sizga Angliya terma jamoasining kelajakdagi yarim himoyachisi kerak.

Elliot Anderson bilan shartnoma imzolash mumkin, shuningdek, men Morgan Rodjers yoki Koul Palmerni qo‘lga kiritishga harakat qilgan bo‘lardim. «Manchester Yunayted»da jamoaning yaxshi o‘zagi bor, biroq Kazemiro ketganidan keyin tayanch yarim himoyachisi va «o‘nlik» pozisiyasi uchun o‘yinchi kerak», — deya Xargrivzning so‘zlarini keltiradi «Manchester United Forever».

Hozirda «Manchester Yunayted» Angliya chempionati turnir jadvalida 31 turdan so‘ng 55 ochko to‘plagan holda uchinchi o‘rinda bormoqda.