«Манчестер Юнайтед»нинг собиқ футболчиси Оуэн Харгривз «қизил иблислар»га ёзги трансферлар бўйича маслаҳат берди.
«Агар «Манчестер Юнайтед» ҳақида гапирадиган бўлсак, уларда Англия терма жамоаси даражасидаги ярим ҳимоя мавжуд эди, аммо сўнгги йилларда улар бундан узоқлашиб кетишди. Уларда Кобби Майну бор. Каземиро кетмоқда. Бруну Фернандешга келсак, унинг «МЮ»да яна қанча қолишини ким билади, дейсиз? Лекин агар сиз таркибни режалаштираётган бўлсангиз, сизга Англия терма жамоасининг келажакдаги ярим ҳимоячиси керак.
Эллиот Андерсон билан шартнома имзолаш мумкин, шунингдек, мен Морган Роджерс ёки Коул Палмерни қўлга киритишга ҳаракат қилган бўлардим. «Манчестер Юнайтед»да жамоанинг яхши ўзаги бор, бироқ Каземиро кетганидан кейин таянч ярим ҳимоячиси ва «ўнлик» позицияси учун ўйинчи керак», — дея Харгривзнинг сўзларини келтиради «Manchester United Forever».
Ҳозирда «Манчестер Юнайтед» Англия чемпионати турнир жадвалида 31 турдан сўнг 55 очко тўплаган ҳолда учинчи ўринда бормоқда.
