Fransiya terma jamoasi ustozi Didye Desham Kolumbiya milliy jamoasiga qarshi kechgan g‘alabali o‘rtoqlik uchrashuvidan so‘ng jurnalistlar bilan muloqot qildi. Mutaxassis raqiblarning «uchranglilar» yulduz vingeri Maykl Olisega nisbatan ishlatgan qo‘pol o‘yinidan norozi bo‘ldi.
«Olisega qarshi ishlatilgan podkat... Yaxshiyamki, u sakrab ulgurdi. Aks holda, Maykl oyoqsiz qolishi mumkin edi. Bunday o‘yinlarda VAR tizimining yo‘qligi mana shunday qo‘pol harakatlarga yo‘l ochib bermoqda. Ushbu vaziyatdan so‘ng juda qattiq g‘azablandim», — deya fransuz mutaxassisining so‘zlarini Footmercato nashri keltiradi.
Eslatib o‘tamiz, Fransiya va Kolumbiya terma jamoalari o‘rtasidagi o‘rtoqlik uchrashuvi AQSHda bo‘lib o‘tdi. Yevropaliklar 3:1 hisobida g‘alaba qozonishdi.
