Франция терма жамоаси устози Дидье Дешам Колумбия миллий жамоасига қарши кечган ғалабали ўртоқлик учрашувидан сўнг журналистлар билан мулоқот қилди. Мутахассис рақибларнинг «учранглилар» юлдуз вингери Майкл Олисега нисбатан ишлатган қўпол ўйинидан норози бўлди.
«Олисега қарши ишлатилган подкат... Яхшиямки, у сакраб улгурди. Акс ҳолда, Майкл оёқсиз қолиши мумкин эди. Бундай ўйинларда ВАР тизимининг йўқлиги мана шундай қўпол ҳаракатларга йўл очиб бермоқда. Ушбу вазиятдан сўнг жуда қаттиқ ғазабландим», — дея француз мутахассисининг сўзларини Footmercato нашри келтиради.
Эслатиб ўтамиз, Франция ва Колумбия терма жамоалари ўртасидаги ўртоқлик учрашуви АҚШда бўлиб ўтди. Европаликлар 3:1 ҳисобида ғалаба қозонишди.
