"Nyukasl" bosh direktori Devid Xopkinson klub yaqin orada jamoa bosh murabbiyi Eddi Xauni iste’foga chiqarish niyatida emasligini ma’lum qildi.

Ayni damda jamoa APL turnir jadvalida 31 o‘yindan so‘ng 42 ochko jamg‘arib, 12-o‘rinda bormoqda.

"Men faqat bir narsani ayta olaman: derbida ("Sanderlend"ga qarshi 1:2) uchragan mag‘lubiyatimiz juda og‘riqli bo‘ldi. Hech birimiz: "Hechqisi yo‘q, bu shunchaki uch ochko edi, oldinga intilishda davom etamiz", deb o‘ylayotganimiz yo‘q.

Yaqinda Eddi bilan tushlik ustida bir necha soat vaqt o‘tkazdik va ko‘plab masalalarni muhokama qildik.

Eddi — bizning murabbiyimiz. Mavsum yakunigacha ajoyib natija qayd etishimizga umid qilaman va vaqti kelganda kelajak haqida gaplashib olamiz. Hozirda bor e’tiborimizni ushbu mavsumdagi musobaqalarga qaratganmiz", — dedi Devid Xopkinson.