«Manchester Yunayted» klubi «Kristal Pelas» yarim himoyachisi Adam Uorton transferidan voz kechishi mumkin.

22 yoshli futbolchi «qizil iblislar»ning maqsadlaridan biri sifatida tilga olinayotgan edi, biroq transfer amalga oshish ehtimoli u qadar yuqori emas. Daily Mail nashri bergan ma’lumotlarga ko‘ra, «MYU» rahbariyati «burgutlar» xavbeki o‘yin uslubi jihatidan Kobbi Maynuga juda o‘xshash deb hisoblamoqda, shu sababli ularni bir vaqtning o‘zida maydonga tushirish qiyin bo‘ladi. Mankunianliklar Elliot Anderson («Nottingem Forest») va Sandro Tonali («Nyukasl») nomzodlarini afzal ko‘rishmoqda.

Transfermarkt portali talqiniga ko‘ra, Adam Uortonning narxi 60 million yevroni tashkil etadi. Yosh ingliz futbolchisining «Kristal Pelas» bilan amaldagi shartnomasi 2029 yilgacha mo‘ljallangan.