«Barselona» darvozaboni Joan Garsiya Ispaniya terma jamoasi safida o‘zining ilk uchrashuvini o‘tkazdi. 24 yoshli futbolchi Misr terma jamoasiga qarshi kechgan o‘rtoqlik o‘yinining 62-daqiqasida David Rayyani almashtirdi. Bu Garsiyaning «qizil furiya» libosidagi debyuti hisoblanadi — bunga qadar u faqat yoshlar terma jamoasida, aynan hozirgi murabbiy Luis de la Fuente qo‘l ostida to‘p surgan edi.
Joan Garsiya o‘tgan yilning yozida «Espanyol»dan «Barselona»ga ko‘chib o‘tgan edi. E’tiborli jihati shundaki, ispaniyaliklar va misrliklar o‘rtasidagi bugungi uchrashuv aynan darvozabon uchun qadrdon bo‘lgan «Espanyol» klubi stadionida bo‘lib o‘tdi.
Eslatib o‘tamiz, JCH-2026 guruh bosqichida Ispaniya terma jamoasi Kabo-Verde, Saudiya Arabistoni va Urugvayga qarshi bahs olib boradi.
