«Барселона» дарвозабони Жоан Гарсия Испания терма жамоаси сафида ўзининг илк учрашувини ўтказди. 24 ёшли футболчи Миср терма жамоасига қарши кечган ўртоқлик ўйинининг 62-дақиқасида Давид Райяни алмаштирди. Бу Гарсиянинг «қизил фурия» либосидаги дебюти ҳисобланади — бунга қадар у фақат ёшлар терма жамоасида, айнан ҳозирги мураббий Луис де ла Фуэнте қўл остида тўп сурган эди.
Жоан Гарсия ўтган йилнинг ёзида «Эспаньол»дан «Барселона»га кўчиб ўтган эди. Эътиборли жиҳати шундаки, испанияликлар ва мисрликлар ўртасидаги бугунги учрашув айнан дарвозабон учун қадрдон бўлган «Эспаньол» клуби стадионида бўлиб ўтди.
Эслатиб ўтамиз, ЖЧ-2026 гуруҳ босқичида Испания терма жамоаси Кабо-Верде, Саудия Арабистони ва Уругвайга қарши баҳс олиб боради.
