AQSH, Kanada va Meksika mezbonlik qiladigan 2026 yilgi FIFA Jahon chempionatida ishtirok etuvchi barcha jamoalar nomi ma’lum bo‘ldi. Ushbu mundialda O‘zbekiston milliy terma jamoasi o‘z tarixida ilk bor qatnashadi.
Fabio Kannavaro boshqaruvidagi “oq bo‘rilar” qur’a natijalariga ko‘ra “K” guruhidan joy oldi. Ushbu guruhda O‘zbekiston Portugaliya, Kolumbiya hamda Kongo Demokratik Respublikasiga qarshi bahs olib boradi.
Score 90 nashri mundial ishtirokchilarining guruh bosqichidagi imkoniyatlarini baholadi. Unga ko‘ra, “K” guruhida Portugaliya 1-o‘rin bilan pley-offga yo‘l olish uchun asosiy favorit sifatida ko‘rilmoqda. Krishtinu Ronaldu boshchiligidagi “Evropa Braziliyasi”ning guruhdan chiqish ehtimoli 64 foizga baholangan. Kolumbiya esa 32 foizlik ko‘rsatkich bilan ikkinchi o‘rinda qayd etilgan.
Guruhning yana bir vakili – Kongo jamoasining imkoniyatlari 3 foizga teng deb topilgan. Portal e’lon qilgan ma’lumotda O‘zbekiston terma jamoasida guruh g‘olibi bo‘lish ehtimoli 2 foiz ekani qayd etilgan.
Ma’lumot uchun, O‘zbekiston milliy terma jamoasi turnirdagi ishtirkini 18 iyun kuni Meksikadagi “Asteka” stadionida Janubiy Amerikaning grand jamoalaridan biri Kolumbiyaga qarshi boshlaydi. 2-turdagi Portugaliyaga qarshi bahs 23 iyun kuni AQSHdagi “Xyuston” stadionida hamda qit’alararo pley-off orqali yo‘llanmani qo‘lga kiritgan Kongo bilan o‘yin esa 28 iyun kuni “Atlanta” stadionida o‘tkaziladi.
Eslatib o‘tamiz, Jahon chempionati 11 iyun kuni start oladi va 19 iyulga qadar davom etadi.
Ma’lumot uchun, ushbu turnir 48 ta davlat ishtirokida va uchta davlat mezbonligida o‘tadigan tarixdagi birinchi mundial hisoblanadi.
