Italiyalik sobiq futbolchi Janfranko Dzola yana bir bor Jahon chempionatining final bosqichidan chetda qolgan Italiya terma jamoasining muammolari haqida o‘z fikrlari bilan o‘rtoqlashdi. Dzolaning hisoblashicha, milliy jamoa rahbariyati tizimni qayta yuklashi va asosiy e’tiborni yoshlarga qaratishi lozim — vaholanki, terma jamoaning hozirgi tarkibida ham yosh o‘yinchilar talaygina.
«Italiyada futbol juda muhim rol o‘ynaydi. Yuz bergan voqea barchani mahzun qildi. Biz hammasini qaytadan boshlashimiz, ishlashimiz va yoshlarga ishonish naqadar muhimligini yodda tutishimiz kerak», — deya Dzolaning so‘zlarini keltiradi calcionapoli1926.it.
Eslatib o‘tamiz, kuni kecha italiyaliklar Mundial yo‘llanmasini Bosniya va Gersegovina terma jamoasiga boy berib qo‘yishgan edi.
