«Barselona» prezidenti Joan Laporta jamoa bosh murabbiyi Xans-Diter Flik bilan yangi shartnoma bo‘yicha muzokaralar qachon va qanday tarzda o‘tkazilishi haqida to‘xtalib o‘tdi.
Germaniyalik mutaxassisning amaldagi kelishuvi 2027 yilning o‘rtalariga qadar mo‘ljallangan. Ma’lum bo‘lishicha, tomonlar shartnomani yana bir yilga uzaytirishni rejalashtirishmoqda.
«Biz Flik bilan yangi shartnomani mavsum yakunida xotirjamlik bilan muhokama qilib olamiz — hozir buning keragi yo‘q. U juda halol va professional mutaxassis, shartnomani uzaytirishga to‘liq loyiq. Biroq yakuniy qaror qabul qilishdan oldin u hamma narsani tahlil qilib olishi kerak», — deya Laportaning so‘zlarini keltiradi Barca Universal.
Hozirda «Barselona» La Liga turnir jadvalida peshqadamlik qilmoqda. Chempionlar Ligasida esa jamoa chorak final bosqichiga yo‘l olgan bo‘lib, unda Madridning «Atletiko» klubiga qarshi bahs olib boradi.
