«Барселона» президенти Жоан Лапорта жамоа бош мураббийи Ханс-Дитер Флик билан янги шартнома бўйича музокаралар қачон ва қандай тарзда ўтказилиши ҳақида тўхталиб ўтди.

Германиялик мутахассиснинг амалдаги келишуви 2027 йилнинг ўрталарига қадар мўлжалланган. Маълум бўлишича, томонлар шартномани яна бир йилга узайтиришни режалаштиришмоқда.

«Биз Флик билан янги шартномани мавсум якунида хотиржамлик билан муҳокама қилиб оламиз — ҳозир бунинг кераги йўқ. У жуда ҳалол ва профессионал мутахассис, шартномани узайтиришга тўлиқ лойиқ. Бироқ якуний қарор қабул қилишдан олдин у ҳамма нарсани таҳлил қилиб олиши керак», — дея Лапортанинг сўзларини келтиради Barca Universal.

Ҳозирда «Барселона» Ла Лига турнир жадвалида пешқадамлик қилмоқда. Чемпионлар Лигасида эса жамоа чорак финал босқичига йўл олган бўлиб, унда Мадриднинг «Атлетико» клубига қарши баҳс олиб боради.