«Barselona» rahbari Joan Laporta o‘yinlar grafigining zichligi bilan bog‘liq muammolar haqida gapirdi.

«Ko‘k-anorranglilar»ning asosiy futbolchisi Rafinya Dias yaqinda Braziliya terma jamoasi safidagi o‘rtoqlik uchrashuvida jarohat oldi va shu sababli taxminan bir oyni o‘tkazib yuboradi.

«FIFA futbolchilar yirik klublarda to‘p surishini inobatga olgan holda taqvimni o‘zgartirishi kerak. Bu shunchaki o‘rtoqlik uchrashuvi edi va eng yaxshi futbolchilarimizdan biri jarohat oldi. Albatta, bu odamni g‘azablantiradi. Futbolchilarni ayblab bo‘lmaydi — ular professionallar, shuning uchun o‘z mamlakatlari uchun bor kuchlarini berishadi. Muammo mavsumning qizg‘in paytida, barcha narsa garovda turgan vaqtdagi zich grafikdadir. Bu juda achinarli holat», — dedi Laporta Mon Esport nashriga bergan intervyusida.

4 aprel kuni «Barselona» La Liga doirasida «Atletiko»ga qarshi maydonga tushadi, 8 va 14 aprel kunlari esa Chempionlar ligasida yana «matraschilar» bilan kuch sinashadi.