«Барселона» раҳбари Жоан Лапорта ўйинлар графигининг зичлиги билан боғлиқ муаммолар ҳақида гапирди.
«Кўк-анорранглилар»нинг асосий футболчиси Рафинья Диас яқинда Бразилия терма жамоаси сафидаги ўртоқлик учрашувида жароҳат олди ва шу сабабли тахминан бир ойни ўтказиб юборади.
«ФИФА футболчилар йирик клубларда тўп суришини инобатга олган ҳолда тақвимни ўзгартириши керак. Бу шунчаки ўртоқлик учрашуви эди ва энг яхши футболчиларимиздан бири жароҳат олди. Албатта, бу одамни ғазаблантиради. Футболчиларни айблаб бўлмайди — улар профессионаллар, шунинг учун ўз мамлакатлари учун бор кучларини беришади. Муаммо мавсумнинг қизғин пайтида, барча нарса гаровда турган вақтдаги зич графикдадир. Бу жуда ачинарли ҳолат», — деди Лапорта Mon Esport нашрига берган интервьюсида.
4 апрель куни «Барселона» Ла Лига доирасида «Атлетико»га қарши майдонга тушади, 8 ва 14 апрель кунлари эса Чемпионлар лигасида яна «матрасчилар» билан куч синашади.
