«Santos» hujumchisi Neymar BraziliyaA Seriya bahslarida yana samarali harakati bilan ajralib turdi.

34 yoshli futbolchi to‘qqizinchi tur doirasidagi «Remo Belem»ga qarshi bahsda (2:0) golli uzatmani amalga oshirib, jamoasining g‘alabasiga hissa qo‘shdi. Shu tariqa, yulduz futbolchi hisobida Braziliya chempionatining 4 ta o‘yinida jami 5 ta samarali harakat — 3 ta gol va 2 ta assist mavjud. Qizig‘i shundaki, ushbu natijalarning barchasi oxirgi to‘rtta o‘yinda qayd etildi, bungacha esa forvard jarohatini davolash bilan band edi.

Ayni paytda Braziliyada Neymarning bo‘lajak Jahon chempionatiga chaqirilishi borasidagi muhokamalar tinmayapti. Taxminlarga ko‘ra, Karlo Anchelotti futbolchini mundial qaydnomasiga kiritmasligi mumkin, biroq hujumchining hozirgi sport formasini hisobga olsak, voqealarning ijobiy rivoji hali ham istisno etilmagan.