Oddiy holda o‘yinoldi matbuot anjumanida raqib jamoaning markaziy himoyachisi haqida savol berilishini kamdan-kam eshitasiz.

Aynan shunday holat O‘zbekiston terma jamoasining Toshkentdagi Gabonga qarshi o‘rtoqlik uchrashuvi oldidan yuz berdi. Savol kim haqida edi? Abduqodir Husanov haqida.

Odatda u ochiq o‘yinlarda yarim maydondan o‘tmasligini hisobga olsak, bu savol biroz g‘alati tuyulishi mumkin.

Ammo «Manchester Siti» himoyachisi nafaqat O‘zbekistonning eng mashhur futbolchisi, balki shubhasiz eng yaxshi o‘yinchisi hamdir. U tezligi va o‘yinni ajoyib o‘qishi bilan himoyada ishonchli, shu bilan birga aniq va uzun uzatmalari orqali hujumlarni boshlab bera oladi.

Gabon terma jamoasi bosh murabbiyi Anise Yala shunday deydi:

«U juda iqtidorli futbolchi. Yosh, juda kuchli sifatlarga ega va “Manchester Siti” kabi katta klubda o‘ynaydi. Biz unga qarshi alohida reja tayyorlaymiz».

Qizig‘i shundaki, 22 yoshli Husanov avvalgi o‘yinda (noyabrda Eronga qarshi o‘rtoqlik bahsida) qizil kartochka olgani sabab bu uchrashuvda ishtirok eta olmas edi. Bu esa Gabon federasiyasining ma’lumot yig‘ish darajasi va savol bergan jurnalistning tayyorgarligi haqida savollar uyg‘otadi.

Biroq asosiy nuqta boshqa — Husanov O‘zbekiston futbolida eng ko‘p muhokama qilinadigan shaxsga aylangan (hatto o‘ynamagan taqdirda ham).

Bir necha kun o‘tib, Venesuelaga qarshi o‘yinda buning sababini yana bir bor ko‘ramiz.

O‘zbekistonda boshqa barcha futbolchilardan ko‘ra Krishtianu Ronalduga bo‘lgan muhabbat yuqori. Husanov esa shu yulduzning o‘zbekcha “versiyasi”ga aylandi.

Hatto u global miqyosda tanilgan ilk o‘zbek futbolchisiga aylanish yo‘lida.

1991 yil mustaqillikdan keyin bir necha futbolchilar bu darajaga yaqinlashgan. Masalan, Odil Ahmedov 100 dan ortiq o‘yin o‘tkazgan va Samuel Eto’O hamda Roberto Karlos o‘ynagan «Anji» jamoasida to‘p surgan. Hatto Arsen Venger uni yoqtirgani aytilgan, ammo 2012 yildagi «Arsenal»ga ehtimoliy o‘tish amalga oshmagan.

Shuningdek, to‘purar va jamoa sardori Eldor Shomurodov «Jenoa» va «Roma»da o‘ynab, zamonaviy o‘zbek futbolida katta iz qoldirgan.

Biroq Husanovning so‘nggi uch yildagi o‘sishi — Belarusning «Energetik-BGU» jamoasidan Fransiyaning «Lans» klubiga, u yerdan esa dunyoning eng yirik klublaridan biri «Manchester Siti»ga o‘tishi — bu borada hammadan ustun.

U hali 22 yoshda.

Toshkentda «The Athletic» suhbatlashgan deyarli barcha odam Husanovni taniydi — futbolga qiziqadimi-yo‘qmi, farqi yo‘q.

Chunki u katta mashhur shaxsga aylangan. Uning surati JCH bilan bog‘liq reklama bannerlarida joy olgan. Bu turnirda O‘zbekiston ilk bor ishtirok etadi va Markaziy Osiyodan birinchi bo‘lib bunday natijaga erishadi.

O‘tgan yili uning to‘yi milliy darajadagi yangilikka aylandi. Yaqinda farzandli bo‘lgani ham keng yoritildi.

Zamin.uz nashri shunday yozgan edi:

«Ko‘pchilik yangi tug‘ilgan farzand otasidek kuchli, irodali va yurt sha’nini dunyoga tanitadigan inson bo‘lishini tilamoqda…».

Husanovning mamlakatda bunday mashhur bo‘lishining sabablaridan biri — o‘zbek futbolchilari xorijga erta ketib, katta darajaga chiqishi kam uchraydigan holatdir. U esa 18 yoshidayoq «Bunyodkor»dan Belarusga yo‘l olgan.

Hozirgi terma jamoada 15 nafar futbolchi mahalliy Superligada o‘ynaydi, yana 8 nafari Eron, Iroq va BAAda to‘p suradi.

Yaqin o‘tmishda yopiq va izolyasiyalangan davlat bo‘lgan O‘zbekistonda bunday yo‘l odatiy emas edi.

Hozir infratuzilma, akademiyalar va murabbiylarga katta sarmoya kiritilmoqda, natijada U-17 va U-20 darajasida muvaffaqiyatlar kuzatilmoqda. Husanov birinchi bo‘lishi mumkin, ammo oxirgisi emas.

Gabonga qarshi o‘yinda u tribunadan o‘yinni kuzatdi va xavfsizlik xodimlari uni muhofaza qilib turdi. O‘zbekiston 3:1 hisobida g‘alaba qozondi, ammo himoyadagi kamchiliklar aynan Husanov yo‘qligi bilan izohlandi.

Venesuelaga qarshi o‘yinda esa u qaytdi va barchasi o‘zgardi.

0:0 hisobidagi o‘yinda 29 ming muxlis uchun asosiy shou aynan Husanov bo‘ldi.

U raqib hujumchilarini osonlik bilan yengdi, uzoq va aniq uzatmalar berdi, zarbalarni to‘sdi — har bir harakati tribunalarda kuchli reaksiya uyg‘otdi.

Bu oddiy markaziy himoyachi harakatlari emas edi. Demak, Husanov ham oddiy futbolchi emas.

Bu, ehtimol, terma jamoalar o‘yinlari davridagi eng kuchli himoya o‘yinlaridan biri bo‘ldi.

O‘zbekiston penaltilar seriyasida g‘alaba qozonib, FIFA Series sovrinini qo‘lga kiritdi. Husanov esa Gabonga qarshi o‘yinda qatnashmaganiga qaramay, turnirning eng yaxshi futbolchisi deb topildi.

O‘zbekistonliklar uning iqtidorini allaqachon bilishar edi, endi esa «Manchester Siti» muxlislari ham buni anglab yetdi.

Bu yozda u mamlakatning barcha umidlarini yelkasida ko‘tarib, ilk Jahon chempionatiga yo‘l oladi.

So‘nggi o‘yinlarga qarab aytsak, u bu bosimni ham uddalay oladi.