«PSJ» bosh murabbiyi Luis Enrike Fransiya chempionati doirasidagi «Tuluza»ga qarshi o‘yin oldidan o‘z fikrlarini bildirdi. Uchrashuv 3 aprel kuni, 28-tur doirasida bo‘lib o‘tadi.

«Yangiliklar juda ijobiy, chunki jarohatlanganlar yo‘q. Yakuniy mashg‘ulotdan so‘ng har bir futbolchining jismoniy va ruhiy holatini ko‘rib chiqamiz. Maydondagi daqiqalar, safarlar, terma jamoalardagi o‘yinlardan keyingi hissiyotlar — bularning barchasidan so‘ng bor e’tiborni «Tuluza»ni mag‘lub etishga va «Liverpul»ga qarshi ikkita o‘yinga tayyorgarlikka qaratishimiz kerak.

Umid qilamanki, hammasi yaxshi o‘tadi va o‘yinchilar tayyor bo‘lishadi. Menimcha, ular mavsumning qaysi bosqichida turganimizni tushunadigan darajada aqlli», — dedi Enrike klub rasmiy saytiga.

Shuningdek, murabbiy raqib haqida ham to‘xtaldi:

«Tuluza» — jismonan kuchli va juda yaxshi jamoa. Statistikaga ko‘ra, ular safarda mag‘lub bo‘lishlari mumkin, lekin bu kamdan-kam hollarda bittadan ortiq to‘p farqi bilan sodir bo‘ladi».

Hozirda «PSJ» 69 ochko bilan 1-o‘rinda, «Tuluza» esa 37 ochko bilan 9-pog‘onada bormoqda.