«An-Nasr» hujumchisi Krishtianu Ronaldu maydonga qaytishini dubl bilan nishonladi.

41 yoshli portugaliyalik yulduz Saudiya Arabistoni chempionati 27-turi doirasidagi «An-Najma»ga qarshi o‘yinda (5:2) raqib darvozasini ikki bor ishg‘ol qildi. Faxriy hujumchining ligadagi gollari soni 23 taga yetdi — u to‘purarlar poygasida uchinchi o‘rinni saqlab qolgan bo‘lsa-da, peshqadamlarga yaqinlashib oldi. Ayni damda «Al-Ahli» a’zosi Ayven Toni 25 ta gol bilan birinchi, «Al-Qodisiya» hujumchisi Xulian Kinyones esa 24 ta gol bilan ikkinchi o‘rinda bormoqda.

«An-Nasr» turnir jadvalida bitta zaxira o‘yiniga ega bo‘lgan «Al-Hilol»ni olti ochkoga ortda qoldirgan holda peshqadamlik qilmoqda.

Eslatib o‘tamiz, Ronaldu fevral oyi oxiridan beri ilk bor maydonga tushdi — u jarohati sababli butun mart oyini o‘tkazib yuborgan edi.