«Ан-Наср» ҳужумчиси Криштиану Роналду майдонга қайтишини дубль билан нишонлади.

41 ёшли португалиялик юлдуз Саудия Арабистони чемпионати 27-тури доирасидаги «Ан-Нажма»га қарши ўйинда (5:2) рақиб дарвозасини икки бор ишғол қилди. Фахрий ҳужумчининг лигадаги голлари сони 23 тага етди — у тўпурарлар пойгасида учинчи ўринни сақлаб қолган бўлса-да, пешқадамларга яқинлашиб олди. Айни дамда «Ал-Аҳли» аъзоси Айвен Тони 25 та гол билан биринчи, «Ал-Қодисия» ҳужумчиси Хулиан Киньонес эса 24 та гол билан иккинчи ўринда бормоқда.

«Ан-Наср» турнир жадвалида битта захира ўйинига эга бўлган «Ал-Ҳилол»ни олти очкога ортда қолдирган ҳолда пешқадамлик қилмоқда.

Эслатиб ўтамиз, Роналду февраль ойи охиридан бери илк бор майдонга тушди — у жароҳати сабабли бутун март ойини ўтказиб юборган эди.