Hozirda Qatarning «As-Sadd» jamoasida faoliyat yuritayotgan Roberto Manchini Italiya terma jamoasi bosh murabbiyligiga qaytishga tayyor. Bu haqda insayder Rudi Galetti xabar bermoqda.
JCH-2026 ga chiqa olmaganidan so‘ng, Italiya milliy terma jamoasini Jennaro Gattuzo tark etdi. Italyanlar ketma-ket uchinchi bor mundialni o‘tkazib yuborishadigan bo‘ldi.
Ta’kidlash joizki, Manchini 2018 yildan 2023 yilgacha «skuadra adzurra» boshqaruvida ishlagan. Uning qo‘l ostida terma jamoa 2020 yilda Yevropa chempioni bo‘lgan edi.
Matbuotda tarqalgan xabarlarga ko‘ra, Italiya terma jamoasi bosh murabbiyligiga Antonio Konte va Massimiliano Allegri ham da’vogarlik qilmoqda.













