«Yuventus» klubi Londonning «Arsenal» jamoasi qanot himoyachisi Rikkardo Kalafyorini sotib olish niyatida. Bu haqda jurnalist Jovanni Albaneze xabar bermoqda.

Manbaning ta’kidlashicha, Turin klubi prezidenti Jon Elkann «Yuventus»da italiyalik futbolchilardan iborat asosiy o‘zakni shakllantirishni istamoqda. Bu esa ham klubga, ham Italiya terma jamoasiga munosib natijalar ko‘rsatishda yordam berishi lozim. Kalafyori jamoaning ehtimoliy yangi a’zolaridan biri sifatida ko‘rilmoqda.

Joriy mavsumda 23 yoshli himoyachi «Arsenal» safida 29 ta o‘yinda maydonga tushib, bitta gol va uchta golli uzatmani amalga oshirdi. «Roma» klubi tarbiyalanuvchisi hisoblangan futbolchining «to‘pchilar» bilan shartnomasi 2029 yilgacha mo‘ljallangan.