"Surxon" bosh murabbiyi Anvar G‘ofurov Superliganing 5-turi doirasida bo‘lib o‘tgan "Buxoro"ga qarshi o‘yin haqida fikrlarini bildirib o‘tdi va jurnalistlar savollariga javob berdi.

— O‘yin haqida fikrlaringiz?
— Oson o‘yin bo‘lmadi. Umuman olganda, chempionatda oson jamoaning o‘zi yo‘q — har bir uchrashuv qiyin kechadi va har bir jamoaning o‘ziga xos o‘yin uslubi bor. Bugungi bahsning birinchi bo‘limida hisobni ishonchli ko‘rinishga keltirib olganimiz sababli futbolchilar maydonda erkinroq harakat qilishdi. Shuningdek, surxondaryolik muxlislarga alohida minnatdorchilik bildiraman — ular stadionda bizni faol qo‘llab-quvvatlashdi.

— Birinchi bo‘limda Doston Tursunov qanot yarim himoyasida harakat qilgan bo‘lsa-da, ko‘p hollarda markazda ko‘rindi. Bu taktik reja edimi?
— Albatta, har bir murabbiy o‘yin uchun turli reja va yechimlarni tayyorlaydi. Biz ham bugungi uchrashuv uchun turli vaziyatlarga mos taktik ishlanmalarni oldindan tayyorlab qo‘ygan edik.

— Asosiy jamoaga murabbiy bo‘lganingizdan so‘ng ijobiy natijalar qayd etildi. Eshitishimizcha, bu ikki o‘yin siz uchun sinov tariqasida berilgan. Keyingi faoliyatingiz qanday bo‘ladi?
— Bu masala bo‘yicha rahbariyat bilan hali gaplashganimiz yo‘q. Yakuniy qarorni rahbariyat qabul qiladi. Mening vazifam esa jamoani har bir o‘yinga yaxshi sport formasi va yuqori kayfiyatda tayyorlashdan iborat.

— «Surxon» jamoasining hozirgi natijalari uning haqiqiy kuchi yoki bu vaqtinchalik holatmi?
— Bu futbol. Jamoa ba’zan yutadi, ba’zan yutqazadi. Har bir uchrashuv uchun aniq reja va vazifa bo‘ladi. Agar reja ishlasa, natija ham ijobiy bo‘ladi. Agar nimadir o‘xshamasa, o‘z vaqtida o‘zgartish kiritish murabbiyning vazifasi.

— Bugun jamoa Dilshod Yo‘ldoshevning futbolkasi bilan suratga tushdi. Unga nima bo‘ldi?
— 2–3 kun avval u operasiyani muvaffaqiyatli o‘tkazdi. Hozir uning ahvoli yaxshi. Butun jamoa Dilshodning tezroq sog‘ayib, safimizga qaytishini kutmoqda. Bugungi o‘yinda ham uning kayfiyatini ko‘tarish va qo‘llab-quvvatlash maqsadida shu ishni amalga oshirdik.