«Atletiko» — «Barselona» uchrashuvining ikkinchi bo‘limi boshida bahsli vaziyat yuzaga keldi. Kataloniyaliklar himoyachisi Jerar Martin raqibning oyog‘iga butsalarining tishi bilan qo‘pol ravishda zarba berdi va qizil kartochka oldi. Biroq VAR aralashuvidan so‘ng chetlatish bekor qilinib, ogohlantirish (sariq kartochka) bilan almashtirildi. Martin qo‘pol to‘qnashuvgacha to‘pni tepib yuborgani jazoni yumshatish uchun yetarli deb topildi.
Martinning chetlatilishi bekor qilinganiga «Real» yarim himoyachisi Federiko Valverdening rafiqasi Mina Bonino munosabat bildirdi. U Martinning raqib oyog‘iga qo‘pol ravishda zarba berayotgan lahzasi muhrlangan kadrni e’lon qildi.
«Agar bu qizil kartochka bo‘lmasa, stadionni yopib qo‘ya qoling», — deb yozdi Mina surat ostiga va kulayotgan emodzini qo‘shib qo‘ydi.
Ma’lumot uchun, Federiko Valverde shanba kuni «Atletiko»ga qarshi kechgan avvalgi o‘yinda olgan qizil kartochkasi sababli «Real»ning «Malyorka» bilan bahsini (madridliklar 1:2 hisobida mag‘lub bo‘lishdi) o‘tkazib yubordi.
