«Los-Andjeles» hujumchisi Son Xyon Min MLS doirasida «Orlando Siti»ga qarshi kechgan bahsning (6:0) bosh qahramonlaridan biriga aylandi.

33 yoshli futbolchi jamoadoshlariga to‘rt bor golli uzatmani amalga oshirdi, e’tiborlisi, barcha assistlar o‘yinning 20-daqiqasidan 39-daqiqasigacha bo‘lgan oraliqqa to‘g‘ri keldi. Janubiy koreyalik futbolchining uzatmalaridan so‘ng uchta holatda Denis Buanga raqib darvozasini ishg‘ol qildi. 58-daqiqaga kelib, hisob 5:0 ko‘rinishida bo‘lib turganda, ikkala futbolchi ham zaxiraga olindi.

Son Xyon Min o‘tgan yilning avgust oyida «Tottenxem»dan «Los-Andjeles» safiga MLS uchun rekord darajadagi 22 mln yevro evaziga ko‘chib o‘tgan edi. Yulduz forvard joriy chempionatning eng yaxshi assistentlari ro‘yxatida peshqadamga aylanib oldi — endilikda uning hisobida oltita uchrashuvda oltita golli uzatma mavjud.