«Arsenal» va Uels terma jamoasining sobiq yarim himoyachisi Aaron Remzi katta futbol bilan xayrlashganini e’lon qildi.
«Bu qarorga kelish men uchun oson bo‘lmadi. Uzoq o‘ylanishlardan so‘ng futbolni tark etishga qaror qildim. Birinchi navbatda, Uelsdan boshlamoqchiman. Uels terma jamoasi libosini kiyish va u bilan ko‘plab unutilmas lahzalarni boshdan kechirish men uchun katta sharaf bo‘ldi. Bu men birga ishlagan barcha murabbiylar va xodimlarning ulkan hissasisiz imkonsiz bo‘lardi.
«Qizil devor» (Uels muxlislari)! Siz barcha qiyinchiliklarni biz bilan birga yengib o‘tdingiz. Pasayish va yuksalishlarda yonimizda bo‘ldingiz va muvaffaqiyatlarimizning ajralmas qismiga aylandingiz. Sizga qanday minnatdorchilik bildirishni ham bilmayman. Biz hammasini birga boshdan kechirdik va sizni ifoda etish men uchun sharaf edi.
Ikkinchidan, men to‘p surish baxtiga muyassar bo‘lgan barcha klublarga rahmat aytaman. Orzuimni amalga oshirish va eng yuqori saviyada o‘ynashimga yordam bergan barcha murabbiy va xodimlardan minnatdorman.
Va rafiqam, farzandlarim hamda butun oilamga katta rahmat. Agar shu vaqt ichida yonimda bo‘lmaganingizda, bularning hech biri amalga oshmasdi», — dedi 35 yoshli futbolchi.
