«Арсенал» ва Уэльс терма жамоасининг собиқ ярим ҳимоячиси Аарон Рэмзи катта футбол билан хайрлашганини эълон қилди.

«Бу қарорга келиш мен учун осон бўлмади. Узоқ ўйланишлардан сўнг футболни тарк этишга қарор қилдим. Биринчи навбатда, Уэльсдан бошламоқчиман. Уэльс терма жамоаси либосини кийиш ва у билан кўплаб унутилмас лаҳзаларни бошдан кечириш мен учун катта шараф бўлди. Бу мен бирга ишлаган барча мураббийлар ва ходимларнинг улкан ҳиссасисиз имконсиз бўларди.

«Қизил девор» (Уэльс мухлислари)! Сиз барча қийинчиликларни биз билан бирга енгиб ўтдингиз. Пасайиш ва юксалишларда ёнимизда бўлдингиз ва муваффақиятларимизнинг ажралмас қисмига айландингиз. Сизга қандай миннатдорчилик билдиришни ҳам билмайман. Биз ҳаммасини бирга бошдан кечирдик ва сизни ифода этиш мен учун шараф эди.

Иккинчидан, мен тўп суриш бахтига муяссар бўлган барча клубларга раҳмат айтаман. Орзуимни амалга ошириш ва энг юқори савияда ўйнашимга ёрдам берган барча мураббий ва ходимлардан миннатдорман.

Ва рафиқам, фарзандларим ҳамда бутун оиламга катта раҳмат. Агар шу вақт ичида ёнимда бўлмаганингизда, буларнинг ҳеч бири амалга ошмасди», — деди 35 ёшли футболчи.