"Pari Sen-Jermen" yarim himoyachisi Vitinya klubdan ketishi mumkinligi haqidagi mish-mishlarga izoh berdi. Avvalroq futbolchiga Madridning "Real" klubi va Saudiya Arabistonining bir qator jamoalari qiziqish bildirayotgani haqida xabarlar tarqalgan edi.

"Hozir ketish ahmoqlik bo‘lardi. Bu men uchun ayni damdagi eng yaxshi qaror deb o‘ylamayman. Men bu yerda, "PSJ"da o‘zimni juda yaxshi his qilyapman.

Menimcha, bu yerdagi odamlar meni chindan ham yaxshi ko‘rishadi va men bu mehrga loyiq bo‘la oldim deb o‘ylayman. Bu yer menga ham, oilamga ham yoqadi. Bizda fantastik jamoa va aql bovar qilmas murabbiy bor.

Saudiya klublarining qiziqishiga kelsak, men shundoq ham bu yerda, Yevropadagi katta klubda yomon ishlab topmayapman. Maoshimning ikki yoki uch baravar oshirilishi meni zarracha ham baxtli qilmagan bo‘lardi", — deya Vitinyaning so‘zlarini keltiradi RMC Sport.

Joriy mavsumda Vitinya barcha musobaqalarda 42 ta o‘yinda ishtirok etib, 7 ta gol urdi va 10 ta golli uzatmani amalga oshirdi. Chorshanba kuni, 8 aprel kuni Parijdagi "Park de Prens" stadionida Chempionlar ligasi 1/4 finali doirasida "PSJ" va "Liverpul" o‘rtasidagi dastlabki uchrashuv bo‘lib o‘tadi. Jamoalar o‘rtasidagi ikkinchi o‘yin 14 aprel kuniga rejalashtirilgan.