«Barselona» vingeri Lamin Yamal o‘tgan dam olish kunlari La Liga doirasidagi «Atletiko»ga qarshi o‘yindan so‘ng nimadandir norozi edi. Chempionlar Ligasi o‘yini oldidan o‘tkazilgan matbuot anjumanida Xans-Diter Flikdan Yamal bilan o‘sha vaziyatni muhokama qilgan-qilmagani haqida so‘rashdi.
«Bu haqda avval ham aytganman. Lamin 18 yoshda ekanini va u aql bovar qilmaydigan o‘yinchi ekanini tushunish kerak. O‘yinni qayta ko‘rib chiqqaningizda, uning g‘ayritabiiy ishlar qilayotganini ko‘rasiz. U atigi 18 yoshda. U besh kishini aldab o‘tdi va deyarli gol urdi. U maydonni hafsalasi pir bo‘lgan holda tark etdi. U hissiyotlarga beriluvchan va bu yaxshi. Men uni doim qo‘llab-quvvatlayman. Ehtiyot bo‘lish kerak — uning har bir harakati atrofda shov-shuv keltirib chiqaradi. U fantastik futbolchi. Men uni doim himoya qilaman. Men unga shunday qilishi mumkinligini va uni doim himoya qilishimni aytdim. U kelajakda bundan ham yaxshiroq bo‘lishi mumkin», — dedi Flik.
Chorshanba, 8 aprel kuni «Barselona» Chempionlar Ligasi doirasida «Atletiko»ni qabul qiladi.
