«Барселона» вингери Ламин Ямал ўтган дам олиш кунлари Ла Лига доирасидаги «Атлетико»га қарши ўйиндан сўнг нимадандир норози эди. Чемпионлар Лигаси ўйини олдидан ўтказилган матбуот анжуманида Ханс-Дитер Фликдан Ямал билан ўша вазиятни муҳокама қилган-қилмагани ҳақида сўрашди.

«Бу ҳақда аввал ҳам айтганман. Ламин 18 ёшда эканини ва у ақл бовар қилмайдиган ўйинчи эканини тушуниш керак. Ўйинни қайта кўриб чиққанингизда, унинг ғайритабиий ишлар қилаётганини кўрасиз. У атиги 18 ёшда. У беш кишини алдаб ўтди ва деярли гол урди. У майдонни ҳафсаласи пир бўлган ҳолда тарк этди. У ҳиссиётларга берилувчан ва бу яхши. Мен уни доим қўллаб-қувватлайман. Эҳтиёт бўлиш керак — унинг ҳар бир ҳаракати атрофда шов-шув келтириб чиқаради. У фантастик футболчи. Мен уни доим ҳимоя қиламан. Мен унга шундай қилиши мумкинлигини ва уни доим ҳимоя қилишимни айтдим. У келажакда бундан ҳам яхшироқ бўлиши мумкин», — деди Флик.

Чоршанба, 8 апрель куни «Барселона» Чемпионлар Лигаси доирасида «Атлетико»ни қабул қилади.