«Arsenal» bosh murabbiyi Mikel Arteta Chempionlar Ligasi 1/4 finali doirasida «Sporting»ga qarshi kechgan birinchi o‘yin (1:0) yakunlarini sarhisob qildi.

– CHL chorak finalida safarda g‘alaba qozonganimizdan juda xursandman. Bu jamoa o‘z uyida yutqazmaganiga ancha bo‘lgandi... Qancha vaqt bo‘lganini ham bilmayman. Menimcha, oxirgi marta bu voqea ham yevrokuboklarda yuz bergan bo‘lsa kerak, bu esa u yerda o‘ynash qanchalik qiyinligini ko‘rsatadi.

– Bugun jamoa gol ura olmasligi mumkinligi haqidagi fikr xayolingizga keldimi?

– Ha, chunki maydonning so‘nggi uchdan bir qismiga yetib borib, u yerda o‘rnashib olganimizda, bizga yakuniy nuqta yetishmayotgan edi. Ular bizni blokirovka qilgan vaqtda mudofaani yorib o‘tish uchun biroz aniqroq, tezroq va samaraliroq harakat qilishimiz kerak edi. Bitta golimiz bekor qilindi, shuningdek, golga yaqin kelgan yana ikki-uchta vaziyat bo‘ldi, ammo hal qiluvchi pas yetishmadi.

Yakunda hujumchilarimizning sehri bizga g‘alaba keltirdi. Bu ajoyib, mavsumning aynan shu pallasida bizga mana shu narsa kerak. Har kim o‘z hissasini qo‘shishi lozim va bugun futbolchilar buni, shubhasiz, uddalashdi.

– David Rayyaning o‘yiniga qanday baho berasiz?

– U ikkita muhim seyvni amalga oshirdi. Bu — Chempionlar Ligasi, bu yerda o‘yin taqdiri doimo jarima maydonchalari ichida hal qilinadi, chunki daraja juda yuqori.

– Kay Xaverts Rayyani dunyoning eng yaxshi darvozaboni deb atadi.

– U hozir fenomenal holatda. David bizga kelib qo‘shilgan kunidan beri ajoyib futbolchi ekanligini ko‘rsatib kelmoqda. U bizning safimizda ekanligidan juda baxtiyormiz, – dedi Arteta «Amazon Prime» efirida.