«PSJ» himoyachisi Ashraf Hakimiy Chempionlar ligasi chorak finalining ilk bahsida «Liverpul» ustidan qozonilgan g‘alabadan so‘ng o‘z fikrlari bilan o‘rtoqlashdi. Parijliklar o‘z uylarida 2:0 hisobida zafar quchishdi. Hakimiy ham «PSJ»ning boshqa ko‘plab vakillari kabi vaziyatlardan foydalanish darajasi haqida to‘xtalib o‘tdi.
«Menimcha, bizda boshqa aniq vaziyatlar ham bo‘lgan edi, ko‘proq gol urishimiz mumkin edi. Biz o‘z xatolarimiz bilan «Liverpul»ni o‘yinda qoldirdik (farqni yirik qilish imkoniyatidan foydalanmadik). Shunga qaramay, ko‘rsatgan o‘yinimizdan mamnunmiz. Keyingi bahslarda ham shu strategiyaga amal qilmoqchimiz.
Berilmagan penaltilar? Men hali takroriy lavhalarni ko‘rmadim. Maydonda bu penaltidek tuyuladi, lekin agar hakam boshqacha qaror qabul qilgan bo‘lsa, biz uning qarorlarini hurmat qilishimiz kerak», — dedi Hakimi Canal+ telekanaliga.
