«Barselona» himoyachisi Ronald Arauxo jamoasining Chempionlar ligasi doirasida Madridning «Atletiko» klubiga qarshi o‘yinda gol ura olmagani haqida gapirdi.
«Kamp Nou»da bo‘lib o‘tgan dastlabki chorak final bahsi kataloniyaliklarning 0:2 hisobidagi mag‘lubiyati bilan yakunlandi.
«To‘p darvozaga kirishni istamasa, bu odamda tushkunlik uyg‘otadi. Hatto o‘yin boshida Reshfordda imkoniyat bo‘lgandi, shuningdek, bizda yana ikki yoki uchta vaziyat yuzaga keldi. Agar hech bo‘lmasa bitta vaziyatdan unumli foydalanganimizda, o‘yin o‘zgarib ketgan bo‘lardi. Ammo bu sodir bo‘lmadi. Biz hisobni tenglashtirish uchun oxirigacha gol izladik, lekin buni uddalay olmadik», — deya Arauxoning so‘zlarini keltirmoqda Barça Universal.
