Londonning «Arsenal» jamoasi bosh murabbiyi Mikel Arteta klub bilan yangi shartnoma bo‘yicha dastlabki muzokaralar o‘tkazdi. Bu haqda BBC xabar bermoqda.

Arteta jamoani 2019 yildan buyon boshqarib kelmoqda. U murabbiy sifatidagi yagona yirik sovrinini «Emireyts»dagi debyut mavsumida qo‘lga kiritgan — o‘shanda «to‘pchilar» Angliya kubogini yutib olgan edi.

Hozirda mutaxassisning amaldagi shartnomasi yakunlanishiga yana bir yil qolgan. Biroq 44 yoshli ispaniyalik o‘z ishi bilan klub rahbariyatini ishontira oldi va ular uni jamoa uchun to‘g‘ri tanlov deb hisoblamoqda.

BBC ma’lumotiga ko‘ra, tomonlar biroz avval yangi bitim bo‘yicha muzokaralarni boshlagan va jarayon ijobiy ruhda kechayotgan edi.

Biroq mavsum yakuniga yaqinlashgani sabab, tomonlar muzokaralarni vaqtincha to‘xtatib, e’tiborni mavsumni muvaffaqiyatli yakunlashga qaratishga kelishib oldi. Shu bilan birga, mavsum natijalari Arteta kelajagiga ta’sir qilmaydi — ham klub, ham murabbiy hamkorlikni davom ettirishni istamoqda.