Londonning «Arsenal» klubi sobiq yarim himoyachisi Jek Uilsher 16 yoshli Maks Doumanning Angliya terma jamoasiga chaqirilishi mumkinligi haqida o‘z fikrlarini bildirdi.

Keng tarqalgan fikrlarga ko‘ra, «uch sherlar» ustozi Tomas Tuxel jahon chempionati oldidan «to‘pchilar»ning porlayotgan yulduziga e’tibor qaratishi lozim.

«Faqat bir narsani aytishim mumkin — agar u Ispaniyada bo‘lganida, albatta jahon chempionatiga borgan bo‘lardi. Angliyada shunday odat bor: biz avval futbolchilarni ko‘klarga ko‘taramiz, keyin esa ularni «himoya qilishni» boshlaymiz. Douman shubhasiz yetarlicha iqtidorga ega. U maydonda doimiy ravishda harakat qilmasa ham, terma jamoaga yordam bera olishi mumkin edi. Ertami-kechmi u baribir o‘sha yerda (terma jamoada) bo‘ladi. Eslatib o‘taman, Lamin Yamal ham 16 yoshida Yevroga borgan va turnirning eng yaxshi futbolchisiga aylangan edi», — deya Uilsherning so‘zlarini keltiradi The Telegraph.

Ma’lumot uchun, shu yilning mart oyida Maks Douman Premyer-liga tarixidagi eng yosh gol muallifiga aylandi.