La Liga prezidenti Xavyer Tebas Ispaniya chempionati o‘yinlarini Marokashda o‘tkazish imkoniyati haqida ochiq bayonot berdi. Bir necha oy avval La Liga o‘yinlardan birini AQSHda tashkil etmoqchi bo‘lgan, biroq futbolchilarning noroziligiga duch kelgach, bu fikridan qaytgan edi.
«La Liga o‘yinlarini Marokashda o‘tkazish imkoniyati bormi? Albatta bor, chunki bu mamlakatda turnirning juda ko‘plab muxlislari mavjud. Bu real variant bo‘lib qolmoqda, ayniqsa, hozirgi vaqtda logistika bilan bog‘liq to‘siqlar minimal darajada ekanligini hisobga olsak. Shuningdek, biz Kasablankadagi yangi stadionda o‘yin o‘tkazish g‘oyasidan mamnunmiz. Nega endi yo‘q?» — deya Tebasning so‘zlarini keltiradi Moroccan News Agency.
Kasablankadagi yangi stadion 2030 yilgi Jahon chempionati uchun qurilmoqda va u 115 000 tomoshabinni o‘z bag‘riga sig‘dira oladi. Qurilish ishlarini 2028 yilgacha yakunlash rejalashtirilgan.
