«Barselona» hujumchisi Ferran Torres «Espanyol»ga qarshi kechgan shanba kungi derbida (4:1) dubl qayd etib, uchrashuv qahramonlaridan biriga aylandi.
26 yoshli futbolchi yanvar oyi oxiridan beri ilk bor gol urdi — u uchrashuvning 9-daqiqasida hisobni ochgan bo‘lsa, 25-daqiqada mehmonlar darvozasini ikkinchi bor ishg‘ol qildi. Hujumchining joriy La Liga mavsumidagi gollari soni 14 taga yetdi — u ilgari hech qachon bir mavsum davomida ichki chempionatda bunchalik ko‘p gol urmagan edi. Uning avvalgi rekordi o‘tgan mavsumda o‘rnatilgan bo‘lib, o‘shanda o‘nta gol qayd etgandi.
«Ko‘k-anorranglilar» vakillari orasida La Ligadagi gollar soni bo‘yicha faqat Lamin Yamal (15 ta gol) Ferrandan oldinda bormoqda. To‘purarlarning umumiy reytingida esa Torres yana uch nafar futbolchidan ortda qolmoqda — bular Kilian Mbappe (23), Vedat Muriki (19) va Ante Budimir (15).
