Madridning «Real» klubi markaziy himoyachisi Raul Asensio bo‘lajak transfer oynasida sotilishga nomzodlardan biri sifatida ko‘rilmoqda.

Defensa Central nashriga tayanib Transfer News Live bergan xabarga ko‘ra, «qirollik klubi» rahbariyati, tarqalgan mish-mishlarga qaramay, 23 yoshli futbolchini sotish ishtiyoqida emas. Shu bilan birga, agar o‘yinchining o‘zi jamoadan ketishni so‘rasa, «qaymoqranglilar» kelib tushadigan takliflarni ko‘rib chiqishga tayyor. Ayni damda ispaniyalik himoyachiga Saudiya Arabistoni chempionati vakillari qiziqish bildirmoqda va ular saxovatli shartlarni taklif qilishga shay.

Transfermarkt portali Raul Asensioning bozor qiymatini 25 million yevroga baholagan. Joriy mavsumda markaziy himoyachi «Real» safida barcha turnirlarda 31 ta o‘yinda maydonga tushib, 2 ta gol va 1 ta golli uzatmani amalga oshirdi.