Kecha, 11 aprel kuni Londonning «Arsenal» klubi Angliya Premyer-ligasining 32-turida kutilmaganda «Bornmut»ga imkoniyatni boy berdi (1:2). «To‘pchilar»ning ushbu muvaffaqiyatsizligiga mashhur britan jurnalisti Pirs Morgan izoh berdi.

Ekspert Mikel Arteta jamoasining ushbu o‘yindagi sustligidan norozi. Statistik ma’lumotlarga ko‘ra, londonliklar bahs davomida 38 marta o‘z darvozabonlariga pas berishgan.

«O‘yinning katta qismida meni eshitmaydigan futbolchilarga qarata bor ovozim bilan "Oldinga!" deb baqirdim. Arteta kimdir unga "qo‘l tormozi"ni tushirishni aytishini yoqtirmaydi, lekin unga o‘sha la’nati "qo‘l tormozi"ni tushirish vaqti keldi», — deb yozdi Morgan ijtimoiy tarmoqlardagi sahifasida.

Hozirda «Arsenal» 70 ochko bilan Angliya chempionati turnir jadvalida yakka peshqadamlik qilmoqda. Agar «Manchester Siti» bugun «Chelsi» ustidan g‘alaba qozonsa, «shaharliklar» va «to‘pchilar» o‘rtasidagi farq 6 ochkoni tashkil etadi.