«Manchester Siti» bosh murabbiyi Xosep Gvardiola nima sababdan uning jamoasi bahor oylarida yuqori sifatli o‘yin namoyish etishi haqidagi savolga javob berdi. Bugun, 12 aprel kuni «shaharliklar» APL 32-turi doirasida «Chelsi» bilan kuch sinashadi.
«O‘ylashimcha, bunga qattiq kelgan qish sababchi. Quyosh qaytib, bahor kelganida ruhiyatimiz ko‘tariladi va o‘zimizni yaxshiroq his qilamiz. Shuning uchun ham jamoa o‘yinlarda g‘alaba qozonmoqda. Bu mavsumda nega unchalik yaxshi emasligimizning sababi ham shu — ob-havo yomon...» — dedi Gvardiola matbuot anjumanida.
Angliya chempionatining 30 ta o‘yinidan so‘ng «Manchester Siti» 61 ochko jamg‘arib, ikkinchi o‘rinda bormoqda. Ular peshqadam «Arsenal»dan to‘qqiz ochko orqada, biroq «shaharliklar»da zaxirada ikkita o‘yin mavjud.
