Belgiyalik hujumchi Romelu Lukaku baribir Neapolga qaytishiga to‘g‘ri keladi — bu safar maydonga tushish uchun emas, balki kelajagi borasida muzokaralar o‘tkazish uchun. Sport Mediaset nashrining xabar berishicha, Lukakuning Italiyaga qaytishi roppa-rosa bir haftadan keyin — 20 aprel kuni kutilmoqda.
Uchrashuv uch tomonlama bo‘ladi: «Napoli» prezidenti Aurelio de Laurentis, bosh murabbiy Antonio Konte va albatta, Romelu Lukakuning o‘zi. Uchrashuvning eng ehtimolli natijasi xayrlashuv formulasini ishlab chiqish bo‘ladi — Kontening futbolchiga bo‘lgan mehri baland bo‘lsa-da, u hozirgi vaziyatga toqat qilishi amrimahol.
Eslatib o‘tamiz, A Seriyaning 32-turi yakunlariga ko‘ra, «Napoli» durang o‘ynagan bo‘lsa-da, turnir jadvalida ikkinchi o‘rindagi mavqeini mustahkamlab oldi.
